Një burrë ka vdekur të premten, më 13.03.2026, në Qendrën Klinike Universitare të Kosovës (QKUK), si pasojë e lëndimeve të rënda të pësura në një sulm të ndodhur para tetë muajsh në fshatin Përlëpnicë të Gjilanit.
Sipas raportit policor, ngjarja ndodhi më 9 gusht 2025, rreth orës 02:30, në afërsi të liqenit të fshatit. Viktima, një mashkull kosovar nga Gjilani, u sulmua nga dy të dyshuar, duke marrë lëndime të rënda që e detyruan të trajtohej gjatë në QKUK.
Policia njoftoi se viktima kishte ndërruar jetë të premten në mëngjes. Me vendim të prokurorit, trupi i pajetë u dërgua në Institutin e Mjekësisë Ligjore (IML) për obduksion.
Burimet policore konfirmojnë se sulmi u raportua menjëherë pas ngjarjes, por viktima kishte mbetur në gjendje të rëndë deri në vdekje.