Në sheshin Mehë Uka në Mitrovicë është vendosur të hënën Ora e pritjes, si pjesë e angazhimit për të shënuar ditët deri në shpalljen e vendimit për ish-krerët e Ushtrisë Çlirimtare të Kosovës. Për këtë ngjarje u mblodhën anëtarë të Partisë Demokratike të Kosovës (PDK) dhe qytetarë të shumtë.
Kjo nismë vjen përmes platformës Liria ka Emër, e cila synon të mbajë vëmendjen te procesi gjyqësor që po zhvillohet në Hagë. Më 22 gusht, e njëjta platformë pati vendosur një orë të ngjashme edhe në kryeqytetin e Kosovës, Prishtinë. Numërimi mbrapsht i vendosur në këto monumente simbolike ka për qëllim të theksojë datën 16 shtator, kur është paralajmëruar shpallja e aktgjykimit për ish-drejtuesit e UÇK-së.