Ministria e Financave, Punës, Transfereve dhe Çështjeve Sociale (MPFVLÇ) ka nisur një proces të gjerë verifikimi të listave të përfituesve të shtesave për fëmijë. Ky veprim vjen si pasojë e shifrave të larta të emigrimit, të raportuara nga Agjencia e Statistikave të Kosovës, të cilat sugjerojnë se një numër i konsiderueshëm i përfituesve mund të mos jenë më banorë të vendit.
Liridon Llozani, këshilltar për media në këtë ministri, konfirmoi se procesi i kontrollit është në zhvillim e sipër. Ai deklaroi se ekziston një numër i konsiderueshëm i rasteve që po i nënshtrohen kontrollit për të përcaktuar nëse ata plotësojnë kriteret e banimit, megjithatë shifrat e sakta për personat që do të largohen nga skema nuk janë ende të disponueshme.
Ekspertët e çështjeve sociale kanë ngritur shqetësime në lidhje me mënyrën e funksionimit të kësaj skeme. Sipas Bardha Qirezit, hulumtuese dhe njohëse e çështjeve sociale dhe arsimore, problemi qëndron te mungesa e një ndërlidhjeje të mirëfilltë mes sistemeve elektronike të institucioneve shtetërore.
"E shoh problemin e shtesave si ndihma të parregulluara me ligj, që janë të menjëhershme, pa kritere të qarta dhe që shpërndahen pa një ndërlidhje të sistemeve që e regjistrojnë popullatën", theksoi Qirezi. Kjo mangësi, sipas saj, krijon hapësira për përfitime të parregullta dhe vështirëson monitorimin e saktë të statusit social të popullsisë.