Max Verstappen, katër herë kampion bote dhe pilot i Red Bull-it, ka lënë të hapur mundësinë e largimit nga Formula 1 në fund të këtij sezoni. Kontrata e tij me ekipin skadon në vitin 2028, por holandezi 28-vjeçar po reflekton për të ardhmen për shkak të pakënaqësisë nga rregullat e reja.
Deklarata u bë menjëherë pas garës në Japoni, ku Verstappen u rendit në vendin e 8-ës pas një dueli të gjatë me Pierre Gasly, i cili e mbylli garën para tij. Në bisedë me BBC-në, piloti tha: «Nuk po më pëlqen më kjo Formula 1. A po e mendoj tërheqjen? Kjo është ajo që po them. Reflektoj për gjithçka që ndodh në këtë paddock».
Ai nënvizoi se 22 garat në sezon e bëjnë të pyesë veten nëse ia vlen të vazhdojë. «Ndoshta preferoj të qëndroj në shtëpi me familjen dhe miqtë, pasi nuk argëtohem më», shtoi Verstappen. Problemi, sipas tij, nuk lidhet me rezultatet apo mungesën e fitoreve, por me mënyrën e garimit.
«E di që nuk mund të fitosh apo të luftosh për podium çdo herë, por unë nuk argëtohem më. Përpiqem të përshtatem, por nuk është e bukur mënyra sesi duhet të garoj. Nuk është produktive për drejtimin e makinës», deklaroi ai. Piloti përfundoi duke thënë se dëshiron të jetë në pistë për të shijuar garën, jo vetëm për fitore: «Mendoj se është bukur të fitosh, por unë dua të kaloj momente të bukura. Për momentin nuk po ndodh kështu».
Këto fjalë kanë ngritur pyetje për të ardhmen e karrierës së Verstappen-it, një nga pilotët më dominues të viteve të fundit.