Protestat në Shqipëri kanë hyrë në ditën e 15-të, me mijëra qytetarë që mblidhen në Tiranë për të kundërshtuar një projekt ndërtimi në një zonë ekologjikisht të ndjeshme të bregdetit të Adriatikut. Në projekt është e përfshirë një kompani e lidhur me Jared Kushner, dhëndrin e presidentit amerikan Donald Trump.
Media gjermane ZDFheute ka pasqyruar përshkallëzimin e protestave, duke theksuar se protestuesit akuzojnë kryeministrin Edi Rama për favorizimin e investitorëve në dëm të mjedisit. Pjesëmarrja e qytetarëve para selisë së Kryeministrisë ka qenë e vazhdueshme.
Nga ana e tij, kryeministri Edi Rama ka deklaruar se projekti përfaqëson një marrëveshje ndërmjet palëve private dhe se qeveria shqiptare “nuk ka të bëjë fare” me të. Megjithatë, ai ka shprehur mbështetjen për investimin dhe ka sqaruar për agjencinë e lajmeve AP se ende nuk është kryer asnjë procedurë formale për vlerësimin e ndikimit në mjedis.
Paralelisht, autoritetet shqiptare kundër korrupsionit kanë nisur hetime dhe deri më tani kanë kërkuar 20 urdhër-arreste. Disa prej tyre dyshohet se ndërlidhen me projektin në fjalë.