Ministri i Infrastrukturës, Dimal Basha, ka njoftuar se po vazhdojnë punimet për zgjerimin e rrugës QMI–Lipjan (N25). Ky investim është cilësuar si i rëndësishëm për përmirësimin e qarkullimit dhe rritjen e sigurisë rrugore në këtë zonë.
Projekti përfshin një segment me gjatësi prej 3.8 kilometrash, ndërsa vlera kontraktuale e tij kap shifrën e 6.8 milionë eurove. Sipas ministrit Basha, gjatë procesit të punës janë identifikuar sfida teknike që lidhen me infrastrukturën nëntokësore, konkretisht me rrjetin e ujësjellësit dhe mungesën e kanalizimit fekal.
Për të adresuar këto pengesa, Ministria e Infrastrukturës është duke u koordinuar me të gjithë akterët përgjegjës. Ministri Basha ka theksuar se institucionet do të monitorojnë nga afër ecurinë e projektit, me qëllim që punimet të realizohen me cilësi dhe brenda afateve të përcaktuara, pavarësisht vështirësive teknike që mund të shfaqen gjatë procesit.