Visar Azemi, deputet i Lidhjes Demokratike të Kosovës, reagoi për skandalin me njehsorët elektrikë. Ai ngriti shqetësime për procesin e hetimit, duke thënë se menjëherë pas nisjes së hetimeve kanë filluar zëvendësimet e njehsorëve të vjetër.
Sipas Azemit, kjo veprimtari rrezikon fshehjen e provave të mundshme të manipulimeve. "Në momentin që ne e kemi bërë publik skandalin me njehsorët elektrikë dhe kanë nisur hetimet, në vend që këta njehsorë të ruhen si prova, ka filluar zëvendësimi i tyre", u shpreh ai. Ai e quajti një veprim të tillë shkelje të rëndë ligjore dhe vepër penale.
Azemi përmendi se KEDS-i dhe Ministria po i ndërrojnë njehsorët, duke rrezikuar fshehjen e manipulimeve. Ai kërkoi që njehsorët të merren dhe të hetohen në laboratorë të pavarur ndërkombëtarë ose vendorë të certifikuar, e jo nga institucionet apo palët e dyshuara për keqpërdorime.
Deputeti insistoi për transparencë të plotë dhe pavarësi në hetim, duke thënie se çdo ndërhyrje dëmton zbardhjen e së vërtetës dhe besimin e qytetarëve. Çështja ka nxitur reagime të shumta në opinionin publik, me thirrje për përgjegjësi institucionale.