Visar Azemi, anëtar i Lidhjes Demokratike të Kosovës (LDK), sot në orën 09:00 do të dorëzojë në Policinë e Kosovës të gjitha dëshmitë në lidhje me njehsorët elektrikë të KEDS-it.
Dëshmitë do të paraqiten në stacionin policor Qendra në Prishtinë, në rrugën Luan Haradinaj (ish 92-shi), sipas njoftimit të LDK-së.
Ky veprim vjen pas pretendimeve të vazhdueshme të Azemit ndaj operatorëve energjetikë, të cilët ai i akuzon për manipulim me matjen e energjisë elektrike në dëm të qytetarëve.
Së fundmi, Azemi i ka bërë thirrje Prokurorisë të ndalojë çdo ndërhyrje në njehsorët elektrikë, duke paralajmëruar se veprime të tilla mund të çojnë në fshehjen e provave.
Ai ka theksuar se ndërrimi i njehsorëve në këtë fazë ngre dyshime për manipulim dhe pengim të hetimeve.
"Mos i prekni njehsorët, mos i fshihni provat", ka deklaruar Azemi, duke kërkuar që institucionet të përmbahen nga çdo veprim derisa të përfundojnë hetimet.
Dorëzimi i dëshmive pritet të jetë një hap i ri në zbardhjen e rastit, për të cilin Prokuroria ka autorizuar Policinë të nisë hetimet.
Përditësime
Visar Azemi i LDK-së dorëzoi dosjen në polici për njëhsorët elektrikë të KEDS-it.
- Policia konfirmoi marrjen e dosjes.
- Azemi kishte dorëzuar më parë dëshmi në ZRrE dhe KEDS.
- Nga 884 njëhsorë të verifikuar, 87% faturojnë më shtrenjtë edhe në tarifën më të lirë.