Arben Vitia, ministër i Shëndetësisë, në një prononcim për Ekonomia Online, u përgjigj ndaj raportimeve të vazhdueshme për mungesa të barnave esenciale në klinikat e QKUK-së, veçanërisht për pacientët me kancer.
Ai theksoi se raportimet shpeshherë ishin të pakonfirmuara. Për këtë arsye, përmes bordit të SHSKUK-së, ka kërkuar publikimin e listës së barnave në stoqet e barnatores qendrore dhe jo vetëm. Ky raportim publikohet prej disa muajsh në uebfaqen e SHSKUK-së, për të shmangur konfuzionin te qytetarët dhe mediat.
Vitia u bëri thirrje qytetarëve të njoftojnë menjëherë SHSKUK-në ose Ministrinë e Shëndetësisë, nëse nuk gjejnë barnat që figurojnë në stok. Ai garantoj se do të merren masat adekuate.
Ministri pranoi se herë pas here ndodhin mungesa tranzitore të barnave për shkak të vonesave në furnizim nga operatorët ekonomikë. Këta penalizohen sipas ligjeve në fuqi. Ai përsëriti se lista e stokut është e aksesueshme për të gjithë qytetarët dhe mediat.