Presidentja e Kosovës, Vjosa Osmani, ka folur për të ardhmen pas përfundimit të mandatit presidencial më 4 prill. Gjatë një interviste në Syri TV me gazetarin Çim Peka, ajo nuk konfirmoi rikthimin në Lidhjen Demokratike të Kosovës (LDK).
Osmani theksoi se do të veprojë në interes të qytetarëve dhe Republikës së Kosovës. "Do ta shoh se cili do të jetë interesi më i madh i Kosovës në këto momente. Kjo do të përcaktohet edhe nga zhvillimet e tanishme", u shpreh ajo.
Ajo komentoi dekretin e saj, të dërguar për shqyrtim në Gjykatën Kushtetuese, duke thënë se masa e përkohshme jep kohë për sqarim çështjesh. "Askush nuk është i pagabueshëm dhe për këtë arsye ekziston ky institucion", nënvizoi Osmani. Ajo premtoi se do të kryejë detyrën si presidente me nder deri në fund të mandatit.
Pas 4 prillit, Osmani do të bëjë një vlerësim të ri konkret për rrugën e mëtejshme. Ajo përmendi se Presidencën si institucion të fortë e ka ndërtuar Ibrahim Rugova dhe do ta lërë të tillë.