Ish-presidentja e Kosovës, Vjosa Osmani, ka përkujtuar Ditën Ndërkombëtare për Përkujtimin e Viktimave të Zhdukura me Dhunë, duke theksuar krizën e vazhdueshme që prek familjet e të zhdukurve gjatë luftës. Në një reagim të publikuar në rrjetet sociale, ajo bëri të ditur se mbi 1500 persona, shumë prej të cilëve fëmijë, mbeten ende pa varr dhe pa drejtësi.
Sipas Osmani, të pagjeturit janë plaga më e thellë e pasluftës dhe dëshmia e krimeve të kryera. Ajo e akuzoi drejtpërdrejt Serbinë se po mban të mbyllura arkivat dhe informacionet për vendndodhjen e varrezave masive, veprim ky që bie në kundërshtim me zotimet e marra në Bruksel.
"Krimi nuk përfundon me heshtjen e armëve. Ai vazhdon edhe sot kur mohohet e vërteta, kur fshihen gjurmët dhe kur familjeve u mohohet e drejta elementare për të ditur fatin e më të dashurve të tyre", u shpreh ajo. Osmani theksoi se propaganda nuk mund ta mbulojë të vërtetën, ndërsa shtoi se për familjarët e viktimave, kërkimi për drejtësi mbetet një dhimbje dhe ankth i përditshëm.