Presidentja e Kosovës, Vjosa Osmani, ka përkujtuar 27-vjetorin e masakrës së Izbicës. Në mesazhin e saj, ajo rikujtoi se 147 civilë të pafajshëm u vranë nga forcat serbe, në mesin e tyre foshnja 6-muajshe Dafina Qelaj.
Sipas Osmanit, Izbica nuk është vetëm dëshmi e dhimbjes dhe e çmimit të lirisë. Ajo është po ashtu kujtesë që nuk guxon të zbehet dhe thirrje që drejtësia të mos vonojë. Presidentja theksoi se krimet e kryera nga Serbia, të cilat sipas saj kishin për qëllim shfarosjen e popullit shqiptar, duhet të përballen me drejtësinë ndërkombëtare dhe vendore.
Osmani nënvizoi se një jetë si ajo e Dafina Qelajt, që sapo kishte filluar, u shua barbarisht bashkë me shumë të tjera brenda shtëpive të tyre, vetëm pse ishin shqiptarë. Ajo shtoi se mungesa e ndëshkimit për autorët mbetet plagë e hapur për familjet dhe shoqërinë.
Kujtimi për të rënët është obligim institucional dhe shoqëror, ndërsa drejtësia për ta mbetet amanet. Në përfundim, presidentja bëri thirrje që kujtimi për martirët dhe dëshmorët të mbetet i përjetshëm, duke theksuar se vetëm përmes ruajtjes së kujtesës dhe vendosjes së drejtësisë mund të ndërtohet një e ardhme e qëndrueshme dhe paqësore.