Ish-presidentja e Kosovës, Vjosa Osmani, zhvilloi një bashkëbisedim me kolumnistin e gazetës amerikane The New York Times, Nicholas Kristof, gjatë qëndrimit të saj në New York. Në fokus të këtij takimi ishin krimet e kryera gjatë luftës në Kosovë, për të cilat, sipas saj, nuk ka ende drejtësi.
Osmani deklaroi se bota duhet të vazhdojë të njoftohet rreth këtyre krimeve, duke u ndalur në plagët e hapura që vazhdojnë të prekin mijëra familje që janë në pritje të fatit të të afërmve të tyre të zhdukur me dhunë. Ajo përmendi varrezat masive, të mbijetuarit e dhunës seksuale, si dhe rastet e fëmijëve të vrarë gjatë periudhës së luftës.
Sipas ish-presidentes, Serbia vazhdon të mohojë gjenocidin, krimet kundër njerëzimit dhe krimet e luftës. Ajo ritheksoi se trajtimi i këtyre temave dhe sigurimi i drejtësisë për viktimat janë parakushte thelbësore për ndërtimin e një paqeje të qëndrueshme dhe një të ardhmeje më të mirë për vendin.