Ish-presidentja e Kosovës, Vjosa Osmani, ka reaguar ashpër ndaj qëndrimeve të institucioneve serbe pas vdekjes së ish-komandantit të Ushtrisë së Republika Srpskas, Ratko Mlladiq, i cili ishte dënuar me burgim të përjetshëm nga Tribunali i Hagës për gjenocid dhe krime lufte. Në një postim në rrjetin social X, Osmani theksoi se reagimi i regjimit të Aleksandar Vuçiqit dëshmon se politika e Serbisë nuk ka ndryshuar, përkundër statusit të saj si vend kandidat për anëtarësim në Bashkimin Evropian.
Osmani akuzoi Brukselin për vazhdimin e financimit të Serbisë me miliarda euro, duke e vlerësuar këtë qasje si të gabuar ndaj një regjimi që, sipas saj, mban lidhje me Rusinë, Kinën dhe Iranin, ndërsa mohon gjenocidin dhe refuzon të hapë arkivat për personat e zhdukur në Kosovë, Kroaci dhe Bosnje e Hercegovinë. Ajo pyeti se për sa kohë Bashkimi Evropian do të vazhdojë të shtiret sikur Serbia ka pësuar ndryshim.
Në të njëjtën linjë, ministri në detyrë për Punë, Familje dhe Vlerat e Luftës Çlirimtare, Andin Hoti, kritikoi deklaratën e presidentit Vuçiq për ofrimin e ndihmës shtetërore për një varrim “dinjitoz” të Mlladiqit. Hoti u shpreh se është ironike që në vitin 2026, një shtet që nderon kriminelët e dënuar për gjenocid dhe bashkëpunon me shtete si Rusia apo Irani, gëzon mbështetje dhe negociata të avancuara për anëtarësim në BE. Sipas tij, në vend që të izolohet, Serbia vazhdon të mbështetet pavarësisht mendësisë së saj që ende frymëzohet nga xhelatët e viteve '90.