Ish-presidentja Vjosa Osmani ka zhvilluar vizita në disa qytete të Kosovës javët e fundit. Ajo ka takuar dhjetëra, nëse jo qindra, qytetarë në Gjilan, Istog, Suharekë, Pejë, Gjakovë dhe Deçan.
Këto aktivitete ngjallin pyetje nëse Osmani po përgatitet për një rikthim në garën politike. Lëvizjet vijnë në një moment të ndjeshëm politik në Kosovë. Nëse brenda më pak se dy javësh nuk arrihet marrëveshje për zgjedhjen e presidentit të ri, vendi mund të mbajë zgjedhje të reja të parakohshme parlamentare, të tretat brenda rreth 16 muajsh.
Osmani kishte shprehur dëshirë për një mandat të dytë presidencial, por nuk u propozua për të. Mandati i saj përfundoi më 4 prill 2026, dhe kryetarja e Kuvendit, Albulena Haxhiu, u bë ushtruese e detyrës së presidentit.
Sipas Donika Eminit, hulumtuese në Grupin Këshillues për Politikat e Ballkanit në Evropë (BiEPAG), vizitat e Osmanit lexohen si pjesë e një strategjie të mirëmenduar. Ajo shpjegon se ato tregojnë përpjekje për të rikthyer dhe konsoliduar lidhjen me elektoratin pas një mandati të fokusuar kryesisht në politikën e jashtme. "Për më tepër, këto vizita mund të shihen edhe si menaxhim i dëmeve nga ndarja e rrugëve me kryeministrin Albin Kurti, dhe si nevojë për të ritheksuar dhe forcuar narrativin e saj në këtë proces", thotë Emini për Radion Evropa e Lirë.
Përçarja mes Osmanit dhe Kurtit lidhet, sipas njohësve të zhvillimeve politike, me dallimet në raportet me Shtetet e Bashkuara të Amerikës, mungesën e koordinimit institucional dhe konkurrencën për ndikim politik.
Osmani kishte nisur angazhimin politik në Lidhjen Demokratike të Kosovës (LDK). Ajo u zgjodh deputete në Kuvendin e Kosovës për herë të parë në vitin 2011 dhe u rizgjodh në disa mandate radhazi. Më vonë, ajo u propozua nga Lëvizja Vetëvendosje (LVV) e Kurtit për postin presidencial pesë vjet më parë.
Përditësime
Në vitin 2019, Vjosa Osmani udhëhoqi listën zgjedhore të LDK-së dhe ishte kandidatja e saj për kryeministër.