Deputetja e zgjedhur e PDK-së, Vlora Çitaku, ka reaguar pas vrasjes së rëndë të një gruaje të re, e cila dyshohet se u vra nga bashkëshorti i saj në shtëpinë ku jetonin. Në një reagim publik, Çitaku ka shprehur shqetësimin e saj në lidhje me sigurinë e grave, duke pyetur se ku mund të ndihen ato të sigurta, kur hapësirat si rruga, vendi i punës dhe vetë shtëpia nuk ofrojnë mbrojtjen e duhur.
Duke iu referuar rastit konkret, ajo theksoi se viktima ishte shtatzënë dhe u vra brutalisht në ambientet e shtëpisë së saj, vendi ku duhej të ishte më e sigurta. Çitaku kritikoi ashpër prirjen e shoqërisë për të kërkuar shpjegime, motive apo arsyetime në rastet e dhunës ndaj grave, duke nënvizuar se nuk mund të ketë asnjë justifikim për vrasjen e tyre. Ajo u shpreh se shpeshherë, përtej dënimit ligjor, shoqëria, familja ose rrethi përpiqen të gjejnë arsye për ta mbrojtur autorin apo për të fajësuar viktimën.
Krahas kërkesës për drejtësi dhe dënim maksimal përmes rrugëve ligjore, deputetja kërkoi një reagim më të fortë nga shoqëria. Ajo u bëri thirrje familjarëve të autorit që të distancohen nga krimi, në vend që të kërkojnë arsye për ta mbrojtur atë. Sipas saj, dhuna ndaj grave duhet të jetë jo vetëm penalisht e dënueshme, por edhe shoqërisht e patolerueshme. Çitaku nënvizoi se dhunuesi duhet ta dijë se nuk do ta mbrojë heshtja, familja apo mentaliteti që shpesh tenton të kërkojë motive për të justifikuar aktet e dhunës.