Një ngjarje e rëndë ka ndodhur në zonën malore të njësisë administrative Lozhan në Maliq, ku një operacion policor për ndalimin e një personi të shpallur në kërkim ka përfunduar me viktima dhe të plagosur. Gjatë shkëmbimit të zjarrit me të dyshuarin Violand Braçellari, ka humbur jetën në krye të detyrës efektivi i forcave Shqiponja, Enea Mekolli.
Në të njëjtën ngjarje ka mbetur i plagosur edhe kolegu i tij, Edison Adri, i cili është dërguar për trajtim mjekësor të specializuar. Burime zyrtare bëjnë me dije se edhe vetë autori, 43-vjeçari Braçellari, ka marrë plagë gjatë shkëmbimit të zjarrit dhe është ndaluar nga forcat e policisë. Ai ndodhet në spital nën mbikëqyrjen e autoriteteve.
Sipas informacioneve të bëra publike, Violand Braçellari kërkohej nga autoritetet që prej vitit 2017, ndërsa dyshohet për vepra penale në fushën e narkotikëve dhe plagosjeve. Përplasja me armë zjarri ndodhi në momentin kur forcat e policisë ndërhynë për ta arrestuar atë në një zonë të izoluar në periferi të Lozhanit. Grupi hetimor po vijon punën për zbardhjen e plotë të dinamikës së këtij incidenti të rëndë.
Përditësime
Hetimet për vrasjen e efektivit të policisë në Maliq zbardhën detaje mbi të dyshuarin Violand Braçellari, i cili dyshohet të jetë ish-ushtarak. Ngjarja ndodhi në orët e para të mëngjesit në fshatin Bodë të Lozhanit, ku autori shfrytëzoi një stan të rrethuar me qen për t'iu shmangur forcave të rendit. Një tjetër efektiv, i plagosur gjatë operacionit, po transportohet me helikopter drejt Spitalit të Traumës në Tiranë për trajtim të specializuar.