Andre Bell, student 20-vjeçar dhe basketbollist i Universitetit Fisk në SHBA, humbi jetën të dielën në mbrëmje pasi u qëllua me armë zjarri teksa ngiste makinën në autostradën ndërshtetërore I-65 North, pranë kryqëzimit me I-40, në Nashville.
Ai po kthehej në kampus bashkë me dy miq kur një person i paidentifikuar hapi zjarr ndaj automjetit, duke e goditur për vdekje. Bell u transportua me urgjencë në Qendrën Mjekësore të Universitetit Vanderbilt, ku ndërroi jetë. Dy miqtë e tij nuk u plagosën dhe dhanë dëshmi policisë, duke thënë se po përdornin telefonat kur dëgjuan të shtënat.
Sipas Policisë Metropolitane, të shtënat erdhën nga një sedan me ngjyrë të errët, drejtuesi i të cilit u largua menjëherë nga vendi i ngjarjes. Autori ende nuk është identifikuar.
Të hënën, prindërit e tij folën për humbjen e djalit. Nëna Amber Lewis e quajti atë “një fëmijë të mrekullueshëm”, ndërsa babi Bradley Lewis theksoi përkushtimin e tij të thellë ndaj familjes dhe vëllait, duke mos humbur kurrë asnjë aktivitet familjar.
Andre Bell njihej si student me rezultate të shkëlqyera, basketbollist i talentuar dhe mik i dashur për shumë njerëz në komunitetin universitar. Vdekja e tij ka tronditur familjen, shokët dhe Universitetin Fisk.
Policia ka theksuar mungesën e lexuesve automatikë të targave në autostradë, duke shtuar se një teknologji e tillë mund të ndihmonte ndjeshëm në identifikimin e automjeteve që largohen nga vendet e krimit. Kjo ka nxitur një debat më të gjerë publik mbi përdorimin e teknologjisë për parandalimin e krimeve.