Një sulm i rëndë ka ndodhur në zemër të Manhattanit, pranë kryqëzimit të West 42nd Street me Seventh Avenue, ku humbi jetën 32-vjeçarja Erin Piacenti. Ngjarja u regjistrua të hënën rreth orës 16:24, kur autorja e dyshuar, Pamela Cisneros, 49 vjeçe, sulmoi kalimtarët në një akt të përshkruar nga autoritetet si të rastësishëm dhe të paprovokuar.
Sipas Policisë së New York-ut (NYPD) dhe komisioneres Jessica Tisch, autorja mbante në duar dy thika të mëdha kur u përball me efektivët e policisë. Pas tentativës për të sulmuar policët, efektivët hapën zjarr, duke e lënë atë të vdekur në vendngjarje. Komisionerja Tisch bëri të ditur se 49-vjeçarja kishte një histori të dokumentuar të problemeve të shëndetit mendor.
Në këtë incident mbeti i plagosur edhe një shtetas 68-vjeçar, identiteti i të cilit nuk është bërë publik, por sipas njoftimeve zyrtare, ai ndodhet nën kujdesin mjekësor dhe është në gjendje të qëndrueshme.
Bank of America konfirmoi humbjen e zëvendëspresidentes së njësisë së saj, duke shprehur ngushëllimet për familjen e të ndjerës përmes një deklarate zyrtare për shtyp. Ajo mbante postin e zëvendëspresidentes në njësinë Business Selection and Conflicts. Autoritetet amerikane vijojnë hetimet për të zbardhur rrethanat e plota të kësaj ngjarjeje, ndërsa qarkullimi në zonën e Midtown Manhattan u ndërpre përkohësisht gjatë kohës që ekipet e emergjencës ndërhynin në vendngjarje.