Aleksandar Vuçiç, presidenti i Serbisë, ka ashpërsuar tonet ndaj bashkëpunimit në fushën e mbrojtjes midis Shqipërisë, Kosovës dhe Kroacisë. Gjatë fjalimit në ceremoninë e Ditës së Shtetësisë më 16 shkurt 2026, ai e cilësoi nismën si aleancë me qëllime konkrete strategjike, jo simbolike.
Vuçiç deklaroi: “Aleancat që po krijohen kundër nesh nuk janë bërë për të qenë lajmi i dytë apo i pestë në edicionet informative, por për të vepruar aktivisht kundër nesh dhe për të krijuar një fushë të unifikuar veprimi pa ‘guralecë në këpucë’, dhe Serbia është ai guralec në këpucë. Prandaj duhet ta ruajmë Serbinë, sepse po krijohen aleanca për ta sulmuar nga drejtime të ndryshme. Unë po them atë që di, dhe kur të shpërthejë një luftë edhe më e madhe, qëllimi është të ekzistojnë forca të afta për të pushtuar vendin tonë”.
Sipas mediave serbe si B92, Vuçiç shtoi se në rast përshkallëzimi të konflikteve globale, kjo aleancë synon pushtimin e Serbisë. Ai theksoi nevojën për ruajtjen e kapacitetit demografik serb përballë presioneve të reja.
Marrëveshja u nënshkrua më 18 mars 2025 në Tiranë dhe synon rritjen e bashkëpunimit strategjik në siguri dhe mbrojtje, forcimin e ndërveprimit ushtarak përmes edukimit, trajnimeve dhe stërvitjeve të përbashkëta.
Autoritetet në Tiranë, Prishtinë dhe Zagreb kanë sqaruar se kjo nuk është pakt ushtarak klasik, por platformë bashkëpunimi për forcimin e kapaciteteve mbrojtëse dhe koordinimin rajonal. Këto shpjegime nuk e kanë bindur Vuçiçin, i cili e sheh zhvillimin si kërcënim të drejtpërdrejtë.