WhatsApp ka prezantuar një modalitet të ri "incognito" për bisedat private me chatbot-in e tij të inteligjencës artificiale. Në këtë mënyrë, as kompania nuk do të jetë në gjendje t'i lexojë përgjigjet e përdoruesve apo të inteligjencës artificiale kur funksioni aktivizohet. Bisedat e kaluara zhduken nga historia e përdoruesit.
Will Cathcart, kreu i WhatsApp, shpjegoi se njerëzit kërkojnë biseda private mbi tema të ndjeshme si shëndeti, marrëdhëniet dhe financat, pa akses nga kompania. "Kemi dëgjuar nga shumë njerëz se ndiejnë njëfarë shqetësimi në lidhje me ndarjen e informacionit personal me kompaninë, megjithatë duan përgjigjet", tha ai.
Një ekspert i sigurisë kibernetike deklaroi për BBC-në se kjo mund të çojë në mungesë llogaridhënieje për WhatsApp në rast se gjërat shkojnë keq, pasi nuk do të ketë qasje në historikun e bisedave.
WhatsApp është në pronësi të Meta-s, e cila zotëron gjithashtu Instagram, Facebook dhe Messenger. Kur Meta AI u shtua në WhatsApp vitin e kaluar, u kritikua nga përdorues që nuk mund ta çaktivizonin atë. Në maj të vitit 2025, shefi i Meta-s, Mark Zuckerberg, tha se Meta AI kishte arritur 1 miliard përdorues në aplikacionet e grupit.
Përditësime
Alice Newton-Rex, Zëvendëspresidente e Produkteve në WhatsApp, njoftoi nisjen e modalitetit incognito për biseda me Meta AI. Përdoruesit mund ta aktivizojnë atë përmes një ikone në bisedat individuale. Bisedat nuk ruhen dhe mesazhet fshihen automatikisht pas mbylljes së aplikacionit ose telefonit. Veçoria do të jetë e disponueshme në WhatsApp dhe në aplikacionin e pavarur Meta AI në muajt e ardhshëm. Funksioni i ri Side Chat do të lejojë pyetje private brenda bisedave grupore pa njoftuar pjesëmarrësit e tjerë.