Erisa Xhixho, deputete e Partisë së Lirisë, në emisionin "Puls" të moderuar nga Bruna Çifligu dhe në A2 CNN, kritikoi qeverinë dhe sistemin e drejtësisë për një krizë të thellë të shtetit ligjor dhe rreziqe për shëndetin e qytetarëve.
Ajo u shpreh se drejtësia vepron me dy standarde, duke goditur opozitën dhe mbrojtur mazhorancën. Sipas saj, rasti i zëvendëskryeministres Belinda Balluku, e akuzuar për afera korruptive, tregon se qeveria përdor parlamentin si mburojë politike për të penguar hetimet e SPAK. "Një zyrtare e lartë nën akuzë nuk mund të sillet sikur asgjë nuk ka ndodhur. Në një vend normal do të kishte dorëheqje të menjëhershme", deklaroi Xhixho.
Deputetja ngriti alarmin për sigurinë ushqimore, duke e cilësuar si problem serioz që pengon integrimin e Shqipërisë në BE. Partia e Lirisë ka depozituar në Kuvend një projektligj që parashikon detyrimin për analiza laboratorike të çdo produkti ushqimor në treg. "Sot produktet kontrollohen në mënyrë sporadike. Qytetarët konsumojnë ushqime pa garanci, ndërsa vendet e BE-së refuzojnë eksportet tona për mungesë standardesh", tha ajo.
Xhixho përmendi se korrupsioni dhe koncesionet klienteliste kanë lënë pa financim sektorë si shëndetësia dhe siguria ushqimore. Ajo evidentoi mungesën e energjisë elektrike në spitale dhe ilaçet e munguara për pacientët onkologjikë si pasojë të keqqeverisjes.
Opozita, sipas saj, do të vazhdojë protestat dhe betejën politike për të rikthyer demokracinë, llogaridhënien dhe sigurinë e përditshme të qytetarëve.