Katër ditë pas ngjarjes së rëndë ku mbeti i vrarë 21-vjeçari portugez Luis Mendes, hetuesit kanë bërë të mundur gjetjen e armës së krimit, një thikë e cila u zbulua e hedhur në disa ferra në një rrugë dytësore. Sipas hetimeve, viktima është qëlluar 7 herë.
Në lidhje me lëvizjet e autorit të dyshuar, Sokrat Vata, policia ka siguruar dëshminë e shtetasit A.Z., i cili e kishte transportuar atë pas ngjarjes. A.Z. deklaroi se kishte vënë re rrobat me gjak të të dyshuarit dhe kishte parë këtë të fundit teksa hidhte një objekt me forcë nga makina, pak përpara se të largohej zbathur. Nga ana e tij, Sokrat Vata ka mohuar të ketë kryer goditjet me thikë. Ai ka pretenduar se i kishte kërkuar një shtetasi turk të quajtur Mahmut, të cilin e kishte njohur në plazh, ta transportonte drejt Tiranës, duke u futur vetë në bagazhin e makinës.
Ndërkohë, një shtetase turke, e cila u arrestua për përkrahje të autorit të krimit, ka mohuar çdo dijeni mbi ngjarjen. Ajo u kap nga autoritetet së bashku me shtetasin N.M., ndërsa po e transportonin Sokrat Vatën drejt kryeqytetit. Ajo theksoi se kishte njohur N.M. në rrjetet sociale pasi ai ofronte makina me qira dhe se prezenca e autorit në bagazh i ishte bërë e ditur vetëm kur një person tjetër kishte telefonuar N.M. për ta njoftuar se po i afrohej një kontrolli policor.
Aktualisht, policia vijon kërkimet për D.Gj., i dyshuar si bashkëpunëtor, dhe për pronarin e lokalit, B.B. Gjykata ka miratuar më parë masën e sigurisë arrest në burg për 6 të pandehur, ndërsa ka liruar 5 persona të tjerë të shoqëruar më herët.