Andri Vokrri, 28-vjeçari i arrestuar si i dyshuar për vrasjen me çekiç të Petrit Ndout, 57-vjeçar, ka dhënë dëshminë e tij në polici. Ai ka shfaqur pendesë dhe është rimarrë në pyetje pasi i ka dalë efektet e alkoolit.
Sipas pohimit të tij, ngjarja ndodhi për shkak të një konflikti rrugor. Vokrri tha se pa një makinë që i kishte zënë rrugën dhe i kërkoi shoferit të largohej për të shmangur aksidentin. "Nuk më dëgjoi dhe kaluam paralel. Kur pashë që makina u fërkua, dola dhe e godita me çekiç. Nuk doja ta vrisja", ka deklaruar ai. Vokrri shtoi se nuk mbante mend çfarë kishte ndodhur dhe as nëse viktima kishte ndërruar jetë.
Dy shokët e autorit, Lorenc Goga dhe Fation Kulla, të arrestuar për moskallëzim krimi, kanë pohuar se u larguan nga vendngjarja nga frika për atë që kishte ndodhur.
Përditësime
Policia ka zbardhur detaje të reja mbi vendngjarjen.
- Ngjarja ndodhi pak pas mesnatës së 20 janarit në fshatin Bushnesh, pranë rrugës Fushë Krujë–Mamurras.
- Konflikti filloi në një rrugë të ngushtë për prioritetin e kalimit dhe përfshiu një gërvishtje të lehtë midis automjeteve.