Pas ngjarjes së rëndë ku mbeti i vrarë një punonjës policie dhe u plagos kolegu i tij, është bërë publike dëshmia e shtetasit A. K., dhënë autoriteteve më 3 qershor 2026. Në kallëzimin e tij, dëshmitari shpjegoi rrethanat e punësimit në stanin e Violand Braçellarit në zonën e Maliqit.
Sipas dëshmisë, kontakti u vendos përmes një kushëriri të Braçellarit në Durrës, i cili i ofroi punë me një pagë prej 120.000 lekësh të vjetra. Më 14 maj 2026, A. K. u dërgua në një fshat, ku u mor nga vetë Violand Braçellari me një automjet tip xhip Nissan ngjyrë gri. Dëshmitari përshkroi një ambient ku Braçellari jetonte me nënën e tij, ndërsa vëllai e vizitonte shpesh.
A. K. pohoi se Braçellari mbante gjithmonë armë zjarri, konkretisht një automatik kallashnikov dhe një çifte, të cilat i merrte me vete edhe gjatë gjuetisë. Dëshmitari vuri në dukje se Braçellari përdorte një telefon pa numër, duke komunikuar vetëm përmes internetit. Në dëshmi përmendet incidenti i datës 27 maj, kur pas një njoftimi për makina me xhama të zinj që po afroheshin, Braçellari mori automatikun që e mbante te dera e stallës dhe u largua me vrap drejt malit.
Aktualisht, Agjencia e Mbikëqyrjes Policore vijon hetimet në lidhje me operacionin e ndërmarrë nga policia në atë zonë.