Gazment Buçpapaj, 40-vjeçar i arrestuar si autor i dyshuar i vrasjes së Egli Pashollarit, 31-vjeçar, më 20 shkurt te ish-Parku në Tiranë, ka dhënë dëshminë e tij në polici.
Sipas deklaratës së tij, ai kishte marrë bashkëshorten nga puna dhe po drejtohej drejt spitalit kur gjeti rrugën e bllokuar. Buçpapaj ka pohuar se i ka rënë borisë makinës së viktimës, ndërsa Pashollari e ka ofenduar nga automjeti.
Të dy mjetet kanë vazhduar lëvizjen për rreth 100 metra. Më pas, sipas Buçpapajt, Pashollari ka ndaluar makinën, ka zbritur dhe e ka ofenduar sërish. Kjo ka çuar në një përleshje fizike me grushte.
Në kushtet e vetëmbrojtjes, Buçpapaj ka goditur Pashollarin me thikë. Pas ngjarjes, ai ka qëndruar në Tropojë tek disa të afërm deri në arrestimin e tij mbrëmjen e së hënës.
Policia e ka marrë në pyetje Buçpapajin pas kapjes në Tropojë.
Përditësime
Laureta Buçpapaj, gruaja e Gazment Buçpapaj, konfirmoi në dëshminë e saj ofendimet e rënda ndaj familjes dhe dyshoi për një thikë me palosje në makinë.
Detaje të reja tregojnë se Egli Pashollari u godit disa herë me thikë pas orës 15:00, me një goditje fatale poshtë shpatullës që shkaktoi humbje të madhe të gjakut.
Dëshmitarë e dërguan në spital, ku mbërriti pa shenja jete.