Hetimet për vrasjen e Renato Hoxhajt, 58 vjeç, më 27 Prill 2025 në Vlorë, kanë zbuluar një rrjet të mirëorganizuar kriminal pas atentatit të kryer nga një vrasës me pagesë rumun. Emisioni "Në Shënjestër" ka zbardhur të dhëna mbi Alesio Dobrozi, emër të njohur në botën e krimit në Shqipëri dhe Itali.
Dobrozi njihet si pjesë e një grupi të dhunshëm në Lezhë, ku bënin pjesë edhe Roan Brahimi, i ekzekutuar në Greqi, dhe Ramazan Rraja, nip i ish-deputetit socialist Rrahman Rraja.
Ai ka qenë i dyshuar në çështjen e bandës "Audi" në Itali për grabitje spektakolare dhe u dënua në 2018 me 4 vite e 6 muaj burg, si dhe 800 euro gjobë. Pas lirimit, emri i tij u përfshi në një ngjarje në Lezhë në vitin 2021, ku tre persona të maskuar hynë në një lokal për të kërkuar kartat e identitetit të klientëve dhe ndoqën pronarin për shkak të një konflikti.
Dosja hetimore e përfshin Dobrozi si dyshuar organizator i atentatit në mbikalimin e Fushë-Krujës më 17 Korrik 2022, ku humbën jetën katër persona, mes tyre kushëriri i Ervis Martinaj.
Detajet e organizimit të atentatit
Më 9 Prill 2025, Eris Mehmetaj dhe Laert Maçi shkuan në Kamëz për të marrë një automjet tip Range Rover Sport, të përdorur më pas në ekzekutimin e Hoxhajt. Mehmetaj pohoi se ishte kontaktuar nga Dobrozi, i cili qëndronte në Dubai, për ta dorëzuar te personi i njohur si "Poçi" nga Vlora, në sheshin "Shqiponja" në Tiranë.
Blerësja ligjore e makinës ishte D. Sako, e cila nuk kishte dijeni për përdorimin e saj dhe nuk mori pjesë në krim. Djali i saj, Igli Sako, siguroi kartën e identitetit të nënës për blerjen. Në banesën e tyre, policia gjeti mbetje të bimëve narkotike Cannabis Sativa.