Pas disa përpjekjeve ndër vite, më datë 28 korrik 2026, pas gërmimeve të kryera në Zubin Potok, janë gjetur mbetje mortore të cilat dyshohet se mund të jenë të 23 intelektualëve të Mitrovicës, të vrarë gjatë luftës në vitin 1999.
Në lidhje me këtë zhvillim, ish-prokurori i Prokurorisë Speciale të Republikës së Kosovës, Elez Blakaj, ka ndarë detaje mbi historikun e kërkimeve. Ai rikujtoi se më 4 gusht 2016, në cilësinë e prokurorit, kishte udhëhequr një operacion gërmimi në fshatin Mala Jabuka të Zveçanit, në një atmosferë tensioni. Në atë kohë, ekipi përbëhej nga bashkëpunëtorë të Institutit të Mjekësisë Ligjore (IML), tre hetues të krimeve të luftës, një përfaqësues të Komisionit Qeveritar dhe dy përfaqësues të kompanisë "Loti".
Blakaj nënvizoi se puna për zbardhjen e fatit të të zhdukurve duhet të finalizohet me rezultate konkrete. "Është tepër e rëndësishme që hetimi përkatësisht për këtë rast, por edhe për rastet tjera, të materializohet dhe të konfirmohet me aktakuzë, sepse kjo është mënyra më e mirë për ta dëshmuar qëllimin e aparatit shtetëror serb për ta zhdukur popullatën civile shqiptare", deklaroi ai.
Sipas ish-prokurorit, përgjigjja më e mirë ndaj propagandës, e cila për vite ka fshehur gjurmët e krimeve dhe ka mbrojtur të dyshuarit, është bashkëpunimi ndërinstitucional. Ai vlerësoi se vetëm përmes hetimeve të thelluara që përfundojnë me aktgjykime dënuese, mund të vendoset drejtësia për viktimat civile.