Rreth 160 predha të mbetura nga Lufta e Dytë Botërore u zbuluan pranë urës së Vodiçës, në fshatin Vodiçë, Njësia Administrative Kotë, Bashkia Selenicë.
Zbulimi ndodhi gjatë punimeve të një firme në zonë, e cila njoftoi menjëherë forcat xheniere për praninë e municioneve të rrezikshme.
Ekspertët e xhenios mbërritën në vendngjarje dhe zhvilluan operacionin për identifikimin dhe largimin e predhave gjatë dy ditëve të fundit. Gjatë ditës së djeshme u gjetën dhe u siguruan rreth 140 predha mortaje, ndërsa sot u evidentuan edhe 20 predha të tjera.
Të gjitha predhat u transportuan në Tiranë, ku do të kryhen procedurat për asgjësimin e tyre në mënyrë të kontrolluar.
Ndërhyrja e shpejtë e forcave xheniere shmangu çdo rrezik të mundshëm për banorët dhe punonjësit e firmës.