Tre shtetas nga qyteti i Vushtrrisë janë raportuar të zhdukur në Shkup, duke nxitur reagimin e familjarëve, të cilët kanë kërkuar ndihmën e qytetarëve dhe të autoriteteve. Sipas të dhënave, Fatmire Shabani, e cila jeton në Gjermani, kishte mbërritur në aeroportin e Shkupit mbrëmjen e së shtunës. Ajo ishte pritur nga vëllai i saj, Ejup Ternava, dhe bashkëshortja e këtij të fundit, Cennet Ternava, të cilët kishin shkuar ta merrnin me automjetin e tyre.
Që nga momenti i nisjes nga aeroporti në drejtim të Kosovës, kontakti me ta ka humbur. Familjarët kanë bërë të ditur se telefonat e personave në fjalë kanë qenë të paqasshëm që nga ora 22:00 e së shtunës. Automjeti me të cilin po udhëtonin është një Mercedes GLC me ngjyrë blu dhe targa MR-DT 2025.
Ambasada e Kosovës në Maqedoninë e Veriut ka konfirmuar se është në komunikim të vazhdueshëm me autoritetet vendase, si dhe në koordinim me Ministrinë e Punëve të Brendshme dhe Policinë e Kosovës për të ndriçuar rastin. Deri në këto çaste, nuk ka asnjë informacion zyrtar mbi lokalizimin e tyre.
Familjarët kanë vënë në dispozicion numrat e mëposhtëm të telefonit për këdo që mund të posedojë informacione të vlefshme:
• +49 1573 8465566
• +49 178 3900599
• +49 176 62983674
• +383 49 195277