Gjatë operacioneve të kërkimit, trupat e tre personave janë gjetur të pajetë brenda mjetit të tyre, i cili kishte dalë nga rruga dhe ishte përmbysur në një zonë pranë pikës kufitare midis Maqedonisë së Veriut dhe Kosovës. Viktimat janë identifikuar si Ejup Ternava, Çenet Ternava dhe Fatmire Shabani.
Sipas informacioneve, grupi ishte parë për herë të fundit të shtunën mbrëma, rreth orës 22:00, në Shkup. Ata po udhëtonin me një automjet Mercedes GLC me ngjyrë blu dhe targa MR-DT 2025, pasi kishin marrë dy prej pasagjerëve nga aeroporti i Shkupit.
Familjarët e viktimave kishin kërkuar ndihmën e publikut në media pasi kishin humbur kontaktet me ta. Autoritetet raportojnë se automjeti është gjetur para se të arrinte të kalonte vijën kufitare, ndërsa po punohet për zbardhjen e rrethanave të aksidentit, ku dyshohet se makina ka përfunduar në lumin Lepenc.