Ambasadori i Kosovës në Maqedoninë e Veriut, Florian Qehaja, ka njoftuar angazhimin e institucioneve diplomatike në bashkëpunim me autoritetet maqedonase, Ministrinë e Punëve të Brendshme dhe Policinë e Kosovës për trajtimin e pasojave pas aksidentit tragjik.
Aksidenti ka ndodhur në territorin e Maqedonisë së Veriut, në afërsi të pikëkalimit kufitar Hani i Elezit–Bllacë. Pas përfundimit të procedurave mjekoligjore dhe administrative, trupat e pajetë të Ejup Tërnavës, Cennet Tërnavës dhe Fatmire Shabanit do të kthehen në Kosovë për ceremonitë e varrimit.
Zëvendëskryeministri Izet Mexhiti shprehu ngushëllime familjarëve, duke e cilësuar rastin si një tragjedi të rëndë. Ai siguroi se autoritetet po mbajnë kontakt të vazhdueshëm me palën kosovare për të mundësuar transportimin e shpejtë të të ndjerëve pas përmbushjes së kritereve ligjore.