Në një kantier ndërtimi në Vjenë të Austrisë, më 17 mars 2026, tre shtetas kosovarë humbën jetën si pasojë e shembjes së betonit. Viktimat janë Pajtim Bajrami, Asllan Musliu dhe Istref Zekaj.
Policia e Vjenës ka urdhëruar autopsitë pas ekzaminimit fillestar të trupave. Një raport fillestar u dorëzua në prokurori, ndërsa hetimet vazhdojnë për të shqyrtuar elemente të mundshme të përgjegjësisë penale.
Inspektorati i Punës është përfshirë në proces. Sipas medias austriake Kronen Zeitung, sindikata e ndërtimit dhe drurit kërkon sqarim të plotë të shkaqeve.
Kryetari federal i sindikatës, Josef Muchitsch, deklaroi: «Mendimet tona janë me viktimat, familjet e tyre dhe kolegët në kantier. Nga porositësi te kontraktorët e deri te personat që punojnë në kantier, të gjithë mbajnë përgjegjësi. Bëhet fjalë për jetë njerëzish. Duhet bërë gjithçka që çdo punëtor ndërtimi të kthehet në shtëpi shëndoshë e mirë në mbrëmje».