Një aksident i rëndë ndodhi dje rreth orës 14:15 në distriktin Alsergrund të Vjenës, Austri, në një kantier ndërtimi. Si pasojë e shembjes së një pjese të konstruksionit, punëtorë mbetën të zënë nën rrënoja dhe disa persona humbën jetën.
Autoritetet austriake konfirmuan se mes viktimave janë tre persona me prejardhje nga Republika e Kosovës: Pajtim Bajrami, Asllan Musliu dhe Istref Zekaj.
Ministria e Punëve të Jashtme dhe Diasporës (MPJD) ka njoftuar se që nga marrja e informacionit është në kontakt të vazhdueshëm me familjarët e viktimave. Përmes kanaleve diplomatike dhe konsullore, ministria ofron mbështetjen e nevojshme për familjarët dhe lehtëson procedurat për kthimin e trupave në Kosovë.
MPJD ka shprehur ngushëllimet më të sinqerta për familjet dhe të afërmit e viktimave, si dhe për të gjithë të prekurit nga kjo tragjedi.