Presidentja e Kosovës Vjosa Osmani ka shprehur ngushëllime për familjet e tre shtetasve kosovarë që humbën jetën në një aksident në kantier ndërtimi në Vjenë, Austri, më 18 mars 2026.
Sipas njoftimit të Ambasadës së Kosovës në Austri, aksidenti ka ndodhur në distriktin Alsergrund. Një pjesë e konstruksionit u shemb gjatë punimeve, duke lënë punëtorë të bllokuar nën rrënoja. Në total, ka katër viktima, prej të cilëve tre janë shtetas kosovarë: Pajtim Bajrami (lindur 1990), Asllan Musliu (lindur 1977) dhe Istref Zekaj.
Ambasada është në kontakt me autoritetet austriake dhe familjarët për mbështetje dhe koordinim të procedurave.
Në telegramin ngushëllues, Vjosa Osmani shkruan: "Me dhimbje të thellë morëm lajmin për humbjen tragjike të jetëve të bashkatdhetarëve tanë: Pajtim Bajrami, Asllan Musliu dhe Istref Zekaj, si pasojë e aksidentit të rëndë në një kantier ndërtimi në Vjenë. Kjo tragjedi e rëndë, që ua ndërpreu jetën teksa punonin për ta siguruar jetesën, ka lënë një dhimbje të thellë e të pashuar jo vetëm te familjet e tyre, por te të gjithë ne. Në këto momente të vështira, ju shprehim ngushëllime familjeve, miqve dhe të afërmve të viktimave. Ndajmë dhimbjen me familjet dhe lutemi që të gjejnë forcë për ta përballuar këtë humbje të rëndë. I përhershëm qoftë kujtimi për Pajtim Bajramin, Asllan Musliun dhe **Istref Zekajn!".