Partia Demokratike në Lezhë zhvillon sot, më 15 shkurt 2026, procesin zgjedhor për të zgjedhur kryetarin e ri të degës lokale. Anëtarësia lokale do të votojë gjatë gjithë ditës, ndërsa rezultatet priten të shpallen pas numërimit të votave.
Në garë marrin pjesë tre kandidatë: Donika Ndoj, Paulin Marku dhe Salvator Kaçaj. Të tre kanë zhvilluar takime me strukturat dhe anëtarët e partisë, ku kanë prezantuar platformat e tyre. Prioritetet përfshijnë organizimin dhe ristrukturimin e partisë, rritjen e angazhimit të anëtarësisë, zgjerimin me prurje të reja dhe përgatitjen për sfidat elektorale.
Kandidatët kanë premtuar transparencë, bashkëpunim dhe prani më aktive në terren. Sipas të dhënave zyrtare, rreth 4 mijë anëtarë të PD-së në Lezhë kanë të drejtë vote, ndërsa interesi për pjesëmarrje vlerësohet i lartë.
Në Partinë Demokratike flitet për zgjedhje në të gjitha strukturat dhe për kryetarin e partisë në muajin prill. Kupola drejtuese ka nxjerrë një vendim për rishikimin e anëtarësisë, i kundërshtuar nga disa kritikë brenda partisë, të cilët e shohin si synim për përjashtimin e anëtarëve.