Një zjarër ka përfshirë një kompleks banimi pranë Spitalit Universitar "Nënë Tereza" (QSUT) në Tiranë. Ministria e Mbrojtjes ka njoftuar se situata po ndiqet nga afër dhe janë angazhuar dhjetëra mjete zjarrfikëse dhe efektivë në vendngjarje.
Fatmirësisht, nuk raportohen persona të lënduar si pasojë e flakëve. Bashkia Tiranë ka operuar me kapacitete të plota, si në mjete ashtu edhe në personel. Në mbështetje të operacionit janë bashkuar:
- Bashkia Kamëz me 2 mjete zjarrfikëse dhe 10 efektivë;
- Bashkia Vorë me 2 mjete dhe 10 efektivë;
- Forcat e Armatosura me 4 mjete zjarrfikëse, 26 efektivë dhe 1 helikopter Cougar;
- Ujësjellës Kanalizime Tiranë (UKT) me 3 autobote uji.
Strukturat përkatëse janë në gatishmëri të plotë dhe po ndjekin situatën vazhdueshëm deri në normalizim.
Deklarata e shefit të zjarrfikësve
Shefi i zjarrfikësve të Tiranës, Arben Cara, deklaroi se pas njoftimit u angazhuan menjëherë kapacitetet e Bashkisë Tiranë, duke përfshirë dy helikopterë dhe efektivë të forcave të ndërhyrjes së shpejtë. Ai theksoi se zjarri ka përfshirë të gjithë kompleksin dhe po punohet intensivisht për lokalizimin e flakëve.
Cara shtoi se bilanci i plotë do të bëhet pas shuarjes së zjarrit, ndërsa punonjësit e zjarrfikësve kanë vetëm djegie të vogla dhe nuk kanë probleme të rënda. Shkaku i zjarrit ende nuk dihet; po mblidhen kamerat e sigurisë dhe po pyeten personat e pranishëm.