Një zjarr i fuqishëm ka përfshirë ambientet e fabrikës së mobilieve dizajnuese Prostoria, në Pustodol Zaçretski, në komunën Sveti Krizh Zaçretje në Kroaci. Zjarri, i cili u njoftua zyrtarisht në orën 16:22, shkaktoi një re të dendur tymi të zi që ishte e dukshme nga distanca të mëdha.
Sipas informacioneve të publikuara nga mediat lokale, si Zagorje International dhe index.hr, flakët kanë nisur nga një strehë pranë së cilës ndodheshin sasi të mëdha mbetjesh sfungjeri. Zjarri u përhap me shpejtësi brenda objektit industrial, duke shkaktuar dëme të konsiderueshme materiale.
Si masë paraprake, autoritetet lokale kanë ndërprerë furnizimin me gaz në fabrikë, pasi objekti përdorte një tharëse me gaz. Në vendngjarje është dërguar një autoambulancë, ndërsa ekipet e zjarrfikësve po vijojnë operacionet për shuarjen e flakëve.
Përditësime
Zjarrfikësit po vijojnë operacionin në fabrikën e mobilieve Prostoria në Kroaci, ku zjarri mbetet ende aktiv. Policia e Qarkut Krapina-Zagorje ka nisur hetimet për zbardhjen e shkaqeve, ndërsa dëshmitë e punonjësve flasin për përhapje të shpejtë të flakëve gjatë evakuimit.