Një zjarr i madh ka përfshirë dhe shkatërruar një fermë blegtorie në qytetin e Patosit gjatë mesditës së sotme. Flakët janë përhapur me shpejtësi të madhe, të favorizuara nga temperaturat e larta dhe sasia e konsiderueshme e ushqimit për bagëtitë që ndodhej në ambientet e fermës.
Fermerët dhe banorët e zonës kanë ndërhyrë fillimisht për të shpëtuar gjënë e gjallë, deri në mbërritjen e forcave zjarrfikëse të Patosit. Për shkak të përmasave të mëdha të zjarrit dhe rrezikut të përhapjes së flakëve drejt objekteve të tjera përreth, në operacionin e shuarjes janë angazhuar edhe zjarrfikësit e Fierit. Pas disa orësh punë intensive, ekipet kanë arritur ta vënë situatën nën kontroll dhe të shmangin përshkallëzimin e flakëve.
Bilanci i kësaj ngjarjeje është i rëndë sa i përket dëmeve. Sipas të dhënave paraprake, mbi 10 krerë bagëti kanë ngordhur si pasojë e flakëve. Gjithashtu, janë shkrumbuar stalla e fermës, makineritë bujqësore dhe rezervat e mëdha të ushqimit për kafshët. Vlera e përgjithshme e dëmeve materiale llogaritet të jetë rreth 7 milionë lekë.
Në vendngjarje kanë mbërritur shërbimet e Policisë së Shtetit dhe grupi hetimor, të cilët kanë nisur punën për verifikimin e rrethanave dhe zbardhjen e shkaqeve që çuan në shpërthimin e këtij zjarri.