Një zjarr me përmasa të mëdha ka përfshirë fshatin Riban në bashkinë Mallakastër, duke shkaktuar dëme të konsiderueshme në bimësi dhe duke vënë në rrezik zonat e banuara. Për shkak të erës së fortë, flakët janë përhapur me shpejtësi në masivin pyjor me pisha, duke e bërë situatën mjaft kritike. Për të garantuar sigurinë e jetës dhe të pronës, shërbimet e Policisë së Fierit dhe të Komisariatit të Policisë Mallakastër kanë evakuuar 15 familje, së bashku me bagëtitë dhe kafshët e tyre shtëpiake.
Në terren është angazhuar një forcë e gjerë operacionale, e cila përfshin strukturat e Drejtorisë Vendore të Policisë Fier, Forcat Kombëtare të Sigurisë, strukturat e emergjencave civile dhe repartet zjarrfikëse nga Patosi, Roskoveci, Mallakastra, Berati, si dhe forcat e shoqërisë Albpetrol. Operacioni po mbështetet edhe nga ajri me një helikopter të Ministrisë së Mbrojtjes dhe një avion Canadair, të cilët po punojnë për izolimin dhe shuarjen e vatrave të zjarrit.
Ndërkohë, një grup hetimor, nën drejtimin e Prokurorisë, po punon për dokumentimin e rrethanave dhe përcaktimin e shkakut të zjarrit, me qëllim identifikimin e autorëve nëse zjarri ka rezultuar si pasojë e veprimeve të paligjshme. Drejtoria Vendore e Policisë Fier u ka bërë apel qytetarëve që të shmangin ndezjen e zjarreve në mjedise të hapura, pasi pasojat për mjedisin dhe pronën mund të jenë të rënda, dhe i ka ftuar ata të denoncojnë çdo rast të dyshimtë në numrin 112.
Përditësime
Drejtori i Shërbimit Zjarrfikës në Mallakastër, Arben Cara, konfirmoi se flakët në Riban nuk kanë dëmtuar banesat, pavarësisht evakuimit të 15 familjeve. Zjarri ka përfshirë 15 hektarë me shkurre dhe ullishte, ndërsa terreni i thyer po e bën të domosdoshme ndërhyrjen manuale të forcave zjarrfikëse. Lidhur me ngjarjen, Policia e Mallakastrës ka arrestuar një 54-vjeçar si të dyshuar për zjarrvënie të qëllimshme. Ndërkohë, në fshatin Fiershegan, një tjetër incident shkaktoi shkrumbimin e një banese, si pasojë e një defekti teknik në kondicioner.
Autoritetet kanë konfirmuar se rreziku për zonat e banuara në Riban të Mallakastrës është eliminuar dhe banorët e evakuuar janë kthyer në shtëpi. Agjencitë e emergjencës saktësuan se numri i familjeve të zhvendosura ishte 3, dhe jo 15 siç u raportua fillimisht. Operacionet për shuarjen e zjarrit janë pezulluar për gjatë natës, ndërsa monitorimi i zonës do të vijojë nesër në mëngjes.
Situata në terren është përkeqësuar pas përhapjes së flakëve në fshatin Koilac. Erërat e forta po favorizojnë avancimin e zjarrit drejt fshatrave Hekal, Panahor, Riban dhe Ngraçan, duke shtuar nevojën për ndërhyrje urgjente në këto zona.
Situata në zonën e Mallakastrës shfaq shenja përmirësimi, ndërsa ekipet e emergjencave vijojnë të jenë në terren. Forcat operacionale kanë ndërhyrë me sukses në zonën Ndrenie-Vlosh-Panahor për shuarjen e vatrave të zjarrit. Autoritetet mbajnë në monitorim të vazhdueshëm situatën, për shkak të rrezikut që paraqesin erërat e forta për riaktivizimin e flakëve.