Vendgrumbullimi i mbetjeve në Fushë-Krujë, pranë fshatit Halilaj, është përfshirë nga flakët, duke shkaktuar një situatë shqetësuese për banorët. Zjarri ka përfshirë sipërfaqen e fushës së mbeturinave dhe, për shkak të përmasave të mëdha dhe natyrës së materialeve, ndërhyrja e forcave zjarrfikëse ka qenë e vështirë.
Në terren është angazhuar një fadromë, e cila po punon për mbulimin e mbeturinave me dhé. Ky proces vlerësohet si metoda më efektive për të izoluar vatrat dhe për të vënë situatën nën kontroll, pasi mjetet standarde zjarrfikëse nuk kanë qenë të mjaftueshme për shuarjen e plotë të flakëve. Deri më tani, nuk raportohet për rrezik direkt ndaj banesave përreth.
Një re e dendur tymi është përhapur në zonë, duke arritur deri në Kamëz e Mamurras, në varësi të drejtimit të erës. Banorët e fshatit Halilaj kanë shprehur shqetësim për erën e rëndë dhe kanë kërkuar ndërhyrje urgjente. Ky incident shënon një rast të përsëritur brenda një harku kohor prej dy muajsh. Autoritetet po hetojnë shkaqet e rënies së zjarrit, ndërsa pista kryesore e hetimit mbetet ajo e zjarrvënies së qëllimshme.
Përditësime
Zjarri në vendgrumbullimin e mbetjeve në Halilaj mbetet aktiv pavarësisht ndërhyrjeve me fadroma për izolimin e flakëve. Mbulimi i mbeturinave me dhé dështoi në ndalimin e procesit të djegies së brendshme, e cila vijon të prodhojë tym të vazhdueshëm në zonë.