Një vatër zjarri u shfaq në një apartament në një pallat të vjetër në lagjen "5 Maji" në Elbasan, duke shkaktuar panik te banorët.
Menjëherë pas njoftimit, dy automjete të shërbimit zjarrfikës mbërritën në vendngjarje dhe ndërhynë me shpejtësi për të neutralizuar flakët. Situata u vu nën kontroll brenda pak minutash falë reagimit të menjëhershëm.
Nga verifikimet paraprake, shkaku i incidentit dyshohet të ketë qenë një defekt në sistemin e aspirimit të apartamentit. Fatmirësisht, nuk raportohet për persona të lënduar dhe banorët rezultuan jashtë rrezikut për jetën.
Autoritetet po vazhdojnë verifikimet për të sqaruar plotësisht rrethanat e ngjarjes. U bëhet thirrje qytetarëve të tregojnë kujdes të shtuar me pajisjet shtëpiake për të shmangur raste të ngjashme.