Në orët e hershme të mëngjesit të 20 janarit 2026, rreth orës 02:00, ka ndodhur një incident zjarri në hapësirën e shkollës fillore Sylejman Vokshi në Deçan. Zjarri ka përfshirë drutë që përdoren për ngrohje, ndërsa ndërhyrja e njësive të zjarrfikësve ka qenë e nevojshme për ta shuar.
Drejtori i Drejtorisë Komunale të Arsimit në Deçan, Besnik Hulaj, ka konfirmuar ngjarjen. Ai ka njoftuar se Drejtoria është informuar nga drejtori i shkollës për incidentin dhe shkaku i zjarrit mbetet i panjohur.
Menjëherë janë lajmëruar edhe Policia e Kosovës, e cila po trajton rastin sipas procedurave ligjore.
Besnik Hulaj ka theksuar se procesi mësimor do të vazhdojë pa ndërprerje, pasi shkolla është e pajisur me kondicionerë për ngrohje. Po ashtu, do të sigurohet furnizimi i menjëhershëm me dru të rinj.
Ai ka falënderuar zjarrfikësit, Policinë e Kosovës dhe të gjithë të angazhuarit për reagimin e shpejtë dhe profesional, sidomos në kushtet e vështira dhe temperaturat e ulëta, ku kanë qëndruar në terren gjatë gjithë natës.