Mesditën e kësaj të shtune, një zjarr ka rënë në dy banesa të pabanuara në lagjen “Çlirim” të qytetit të Beratit. Flakët kanë nisur fillimisht nga oborret e shtëpive dhe, për shkak të temperaturave të larta dhe erës së fortë, janë përhapur me shpejtësi në godinat përreth. Banorët e zonës kanë lajmëruar menjëherë shërbimin zjarrfikës, i cili ka mbërritur në vendngjarje me 3 mjete për të shuar flakët. Në mbështetje të operacionit kanë shkuar edhe forca të shumta të Policisë së Shtetit.
Gjatë operacionit, rreziku është zgjeruar edhe te çatia e një banese që gëzon statusin e monumentit të kulturës. Megjithatë, ndërhyrja në kohë e zjarrfikësve ka bërë të mundur lokalizimin e flakëve dhe shmangien e dëmeve të mëtejshme. Për shkak të pranisë së zjarrit, një automjet tip Ford që ndodhej aty pranë është dëmtuar në pjesën e përparme, por është larguar me sukses nga zona e rrezikut.
Forcat zjarrfikëse kanë qëndruar në zonë për të monitoruar situatën dhe për të parandaluar riaktivizimin e vatrave të nxehta. Sipas burimeve nga shërbimi zjarrfikës në vendngjarje, dyshohet se zjarri mund të ketë qenë i qëllimshëm. Grupi hetimor ka nisur verifikimet përkatëse për të zbardhur shkaqet dhe rrethanat e plota të kësaj ngjarjeje.