Një zjarr ka shpërthyer të dielën në ullishtet e fshatit Duhanas të Beratit, duke përfshirë një pjesë të kodrës me pemë ulliri.
Sipas informacioneve paraprake, flakët kanë nisur në pjesën fundore të kodrës dhe janë përhapur me shpejtësi drejt sipërfaqes së mbjellë me ullishte, të favorizuara nga era. Zjarri po avancojnë gjithashtu në drejtim të një zone të gjelbëruar me pisha.
Tymi i dendur dhe flakët janë parë nga banorët e zonave përreth në Berat, veçanërisht në lagjen Uznovë në pjesën fundore të qytetit.
Në vendngjarje kanë mbërritur forcat e repartit zjarrfikës dhe efektivë të policisë, të cilët po punojnë për lokalizimin e flakëve dhe shuarjen e zjarrit.
Deri më tani nuk dihen shkaqet e ngjarjes. Autoritetet po verifikojnë nëse bëhet fjalë për zjarrvënie të qëllimshme apo incident të shkaktuar nga pakujdesia.