Zjarr në fushën e Lazaratit, shuhet nga zjarrfikësit

Një zjarr ka rënë mbrëmjen e së premtes, më 28 gusht 2026, në fushën e Lazaratit, në qytetin e Gjirokastrës. Njoftimi për ngjarjen është marrë nga shërbimet e emergjencës në orën 20:36, pas një telefonate të ardhur nga një qytetar. Menjëherë pas sinjalizimit, forcat e Drejtorisë së MZSH-së Gjirokastër u nisën drejt vendngjarjes. Me mbërritjen e tyre, zjarrfikësit vlerësuan se vatra kishte marrë përmasa të konsiderueshme dhe kërkonte ndërhyrje të menjëhershme. Në operacionin për izolimin dhe shuarjen e flakëve u angazhuan 3 grupe zjarrfikëse. Falë ndërhyrjes në kohë, flakët u vunë nën kontroll dhe nuk u lejua përhapja e tyre në sipërfaqe të tjera përreth. Zjarri u shua plotësisht në orën 21:50. Sipas të dhënave zyrtare, nuk janë shkaktuar dëme materiale si pasojë e këtij incidenti.