Pesë të rinj humbën jetën dhe katër të tjerë mbetën të lënduar si pasojë e një zjarri që përfshiu mbrëmjen e së hënës katin e fundit të një ndërtese rezidenciale në qytezën Manlleu, në afërsi të Barcelonës.
Sipas raportimeve paraprake, zjarri fillimisht përfshiu papafingon e godinës, e cila shërbente si magazinë. Shërbimi zjarrfikës katalanas bëri të ditur se personat që ndodheshin në papafingon nuk mundën të dilnin, për arsye që ende nuk janë bërë të ditura.
Identitetet e viktimave, prej të cilëve tre ishin të mitur, nuk janë publikuar ende. Mediat lokale raportojnë se asnjë prej tyre nuk ishte banor i ndërtesës. Një i afërm i njërit prej viktimave deklaroi se të rinjtë e përdornin magazinën si vendtakim.
Autoritetet lokale kanë shpallur tre ditë zie në nder të viktimave. Hetimet për shkaqet e zjarrit vijojnë.