Një zjarr ka rënë mbrëmjen e të enjtes në katin e parë të një pallati në rrugën Ali Demi, Tiranë, ku ka humbur jetën 72-vjeçari Theodhor Llulla.
Ngjarja ka ndodhur rreth orës 21:20. Flakët kanë përfshirë banesën ku jetonte i moshuari, i cili dyshohet se ka vdekur nga asfiksia e shkaktuar nga tymi. Viktima jetonte i vetëm dhe kishte aftësi të kufizuara, duke e penguar lëvizjen e tij.
Policia e Tiranës njofton se "rreth orës 21:20, në rrugën 'Ali Demi', në katin e parë të banesës së shtetasit Th. Ll, 72 vjeç, ka rënë zjarr. Si pasojë dyshohet se ka humbur jetën 72-vjeçari. Grupi hetimor ndodhet në vendngjarje dhe po punon për përcaktimin e shkakut të rënies së zjarrit dhe sqarimin e plotë të rrethanave të rastit".
Zjarri ka shkaktuar panik tek banorët e zonës, por nuk raportohen të lënduar të tjerë. Hetimi po vazhdon për të sqaruar rrethanat e sakta.