Një zjarr i fuqishëm ka përfshirë mëngjesin e kësaj të diele ambientet e një magazine në zonën e Fllakës, në Sektorin Rinia të Durrësit. Flakët kanë rënë në hapësirën ku përgatitej ushqimi për punonjësit e subjektit, i cili administrohet nga shtetasi me inicialet S. M.
Si pasojë e flakëve, ka humbur jetën nga asfiksia shtetasi O. M., 25 vjeç, nga Bangladeshi. Një tjetër punonjës, 30-vjeçari me inicialet Ch. Ch. nga Kenia, ka mbetur i lënduar dhe është transportuar në spital për të marrë ndihmën e nevojshme mjekësore.
Shërbimet e Policisë dhe forcat zjarrfikëse kanë ndërhyrë menjëherë në vendngjarje, duke bërë të mundur izolimin dhe shuarjen e flakëve. Grupi hetimor, nën drejtimin e Prokurorisë, ka nisur hetimet për zbardhjen e plotë të rrethanave të ngjarjes, konfirmimin e shkakut të shpërthimit të zjarrit dhe verifikimin e kushteve të sigurisë në mjediset e punës.