Zjarr pranë repartit ushtarak në Gjirokastër, shpëtohen kosheret

Një vatër zjarri është regjistruar mesditën e sotme në zonën e njohur si “Poligoni”, mbi repartin ushtarak në Gërhot të Gjirokastrës. Flakët kanë rrezikuar seriozisht një park bletësh dhe objektet ndihmëse që ndodheshin në atë hapësirë. Sipas njoftimit të Drejtorisë së Mbrojtjes nga Zjarri dhe Shpëtimit, alarmi për zjarrin është dhënë rreth orës 12:50. Me të mbërritur në vendngjarje, zjarrfikësit kanë konstatuar se flakët kishin përfshirë të gjithë sipërfaqen e parkut të rrethuar me rrjetë teli, duke u përhapur edhe në perimetrin jashtë tij. Ndërhyrja e menjëhershme e dy grupeve të zjarrfikësve ka bërë të mundur izolimin dhe shuarjen e plotë të vatrës së zjarrit, duke shmangur dëmtimin e koshereve të bletëve. Si pasojë e flakëve, është shënuar dëmtimi i një kasolleje e cila përdorej për ruajtjen e materialeve dhe pajisjeve të bletarisë. Autoritetet dyshojnë se shkaku i rënies së zjarrit ka qenë pakujdesia gjatë përdorimit të tymit për trajtimin dhe kontrollin e koshereve. Organet ligjzbatuese kanë nisur hetimet për të zbardhur rrethanat e plota dhe për të konfirmuar shkakun përfundimtar të ngjarjes.